خیبرپختونخواہ اسمبلی کے آزاد رکن پاکستان مسلم لیگ میں شامل

چودھری شجاعت حسین نے مفتی عبیدالرحمن کو کے پی کے اسمبلی میں پارلیمانی لیڈر مقرر کر دیا

ملک کی سلامتی و بقا کیلئے مثبت کردار ادا کرتے رہیں گے ہم اندر باہر سے مذہبی ہیں: وفد سے ملاقات کے موقع پر گفتگو

لاہور(03اگست2018) خیبر پختونخواہ اسمبلی کے نومنتخب آزاد رکن مفتی عبیدالرحمن نے وفد کے ہمراہ یہاں پاکستان مسلم لیگ کے صدر و سابق وزیراعظم چودھری شجاعت حسین اور سینئرمرکزی رہنما و سابق نائب وزیراعظم چودھری پرویزالٰہی سے ملاقات کی اور ساتھیوں سمیت پاکستان مسلم لیگ میں شمولیت کا اعلان کیا۔ اس موقع پر ایم این اے طارق بشیر چیمہ، ایم این اے حسین الٰہی اور سینیٹر کامل علی آغا بھی موجود تھے جبکہ وفد میں ضلعی صدر کے پی کے محبوب اللہ جان، ڈاکٹر محمد حنیف، ملک شہباز، ملک محمد افضل، نورالحسن، عبدالرحمن، محمد قاضی، غلام علی اور دیگر معزز شخصیات بھی شامل تھیں۔ نومنتخب رکن مفتی عبیدالرحمن نے کہا کہ پاکستان میں چودھری صاحبان کا بڑا مقام ہے، ان کا گھرانہ مذہبی گھرانہ ہے، خاندان کی رواداری کو مدنظر رکھتے ہوئے پاکستان مسلم لیگ میں شمولیت کا فیصلہ کیا ہے۔چودھری شجاعت حسین نے کہا کہ مرکز اور پنجاب کے بعد خیبرپختونخواہ میں بھی ہماری پارٹی تحریک انصاف کو سپورٹ کرے گی، سیاست میں لوگ آتے جاتے رہتے ہیں مگر ہم اپنے ساتھیوں کا ساتھ کبھی نہیں چھوڑتے۔ چودھری شجاعت حسین نے مفتی عبیدالرحمن کو کے پی کے اسمبلی میں پارٹی کا پارلیمانی لیڈر مقرر کر دیا۔ چودھری شجاعت حسین نے کہا کہ ہمارا گھرانہ اندر اور باہر سے مذہبی ہے لہٰذا ملک کی سلامتی کیلئے ہم اپنا مثبت کردار ادا کرتے رہیں گے۔ بعد ازاں پاکستان مسلم لیگ کی سلامتی و بقا اور مسلم لیگ کی ترقی کیلئے دعائے خیر کروائی گئی۔