حکومت بدلنے کی کسی بھی سازش کیخلاف بھرپور مزاحمت کرینگے: چودھری شجاعت حسین

سالک حسین کو پاکستان بھر میں سب سے زیادہ 68 ہزار اور مونس الٰہی کو دوسرے نمبر پر 50 ہزار کی لیڈ ملنے پر شکرگزار ہیں، گجرات کے بعد چکوال ہمارا دوسرا گھر ہے

عمران خان کی نیت صاف ہے، 100 دن کی بجائے ساڑھے چار سال کا پلان دیں، این اے 65 میں بجلی، گیس، صحت کے منصوبے بنائیں گے

سردار غلام عباس، ممتاز ٹمن، حافظ عمار یاسر، دیگر رہنماؤں اور تلہ گنگ کے عوام کا شکرگزار ہوں، علاقہ کے مسائل حل کرینگے: سالک حسین

لاہور/چکوال(15اکتوبر2018) پاکستان مسلم لیگ کے صدر و سابق وزیراعظم چودھری شجاعت حسین نے کہا ہے کہ عمران خان کی حکومت کو اپنی مدت پوری کرنی چاہئے، کسی بھی سازش کے ذریعے حکومت کو بدلنے کی کوشش کی گئی تو بھرپور مزاحمت کریں گے۔ وہ تلہ گنگ میں مبارکباد دینے آنے والوں کے بڑے اجتماع سے خطاب کر رہے تھے۔ نومنتخب ایم این اے چودھری سالک حسین نے کہا کہ اپنی اس عظیم کامیابی پر وہ سردار غلام عباس، سردار ممتاز ٹمن، حافظ عمار یاسر، دیگر رہنماؤں اور تلہ گنگ کے عوام کے مشکور ہیں، علاقہ کے مسائل حل کرنے کیلئے حکومت سے بات کرنے کے علاوہ ہم سے اپنی حیثیت میں جو ہو سکا وہ بھی کریں گے۔ اس موقع پر چودھری شافع حسین، سروش طاہر، ملک منصب، ملک صفدر، حاجی عبدالقیوم، حاجی عمر حبیب، حاجی شادی خان اور دیگر رہنما ان کے ہمراہ تھے۔ چودھری شجاعت حسین نے کہا کہ عمران خان نے 100 دن کا پلان دیا ہے 100 دن میں پچاس لاکھ گھر نہیں بنا کر دینے، وزیراعظم عمران خان 100 دن کی بجائے ساڑھے چار سال کا منصوبہ دیں، عمران خان کی نیت صاف ہے اگر سازشی عناصر نے رکاوٹ نہ ڈالی تو وہ ملک کیلئے ضرور کچھ کریں گے۔ انہوں نے مزید کہا کہ عوام نے 22 سال کے بعد عمران خان کو بھرپور مینڈیٹ دیا ہے۔ انہوں نے کہا کہ پورے پاکستان میں حلقہ این اے 65 سے چودھری سالک حسین کی سب سے زیادہ 68 ہزار کی لیڈ ہے جبکہ دوسرے نمبر پر گجرات سے ہمارے ہی گھر سے مونس الٰہی 50 ہزار کی لیڈ سے جیتے ہیں، میں عوام کا تہہ دل سے شکر گزار ہوں کہ انہوں نے ہم پر مسلسل اعتماد کا اظہار کیا، ہم انشاء اللہ اس بات کا پاس رکھیں گے، گجرات کے بعد تلہ گنگ ہمارا دوسرا گھر ہے، انشاء اللہ حلقہ میں ہم ترقیاتی کاموں، بجلی، گیس اور صحت کے شعبوں میں خصوصی توجہ دیں گے جو علاقے بجلی اور گیس سے محروم ہیں وہاں بجلی و گیس پہنچائیں گے، بلکسر۔ میانوالی روڈ دو رویہ کرائیں گے اور جن علاقوں میں ہسپتال کی سہولت موجود نہیں وہاں ہنگامی بنیادوں پر موبائل ہسپتال کا بندوبست کیا جائے گا، حافظ عمار یاسر اور تلہ گنگ کے عوام نے نے ہمارے خاندان کا جو ساتھ دیا ہے اور جو محبت کی ہے اسے کبھی نہیں بھلا سکتے۔

—————-

’’نوازشریف نے میری بات پر عمل نہیں کیا لیکن آپ میں کبھی ’’میں‘‘ نہ آئے اور چاپلوسوں اور منافقین سے ہوشیار رہیں‘‘

چودھری شجاعت حسین کی اپنے نومنتخب ایم این اے بیٹے سالک حسین کو نصیحت

لاہور/چکوال(15اکتوبر2018) پاکستان مسلم لیگ کے صدر و سابق وزیراعظم چودھری شجاعت حسین نے تلہ گنگ میں اپنے صاحبزادے چودھری سالک حسین کی ریکارڈ ووٹوں سے کامیابی پر مبارکباد دینے آنے والوں سے خطاب میں کہا کہ میں سالک حسین کو بھی وہی نصیحت کرنا چاہتا ہوں جو میں نے نوازشریف کو کی تھی کہ آپ میں کبھی ’’میں‘‘ نہیں آنی چاہئے، دوسرا چاپلوسوں اور منافقین سے ہوشیار رہیں تو آپ ضرور کامیاب ہوں گے۔ انہوں نے سالک حسین کو مخاطب کرتے ہوئے کہا کہ نوازشریف نے میری کسی بات پر عمل نہیں کیا لیکن سالک حسین آپ اس پر ضرور عمل کرنا۔

Share