علماء کرام کے ہوتے اسلام دشمن عناصر اپنے مقاصد میں کبھی کامیاب نہیں ہو سکتے: چودھری پرویزالٰہی

سپیکر پنجاب اسمبلی سے سیکرٹری جنرل وفاق المدارس قاری حنیف جالندھری کی ملاقات، چودھری شجاعت حسین کی خیریت دریافت کی، راسخ الٰہی بھی ملاقات میں موجود تھے

متحدہ علماء بورڈ سے دینی کتب اور مذہبی مواد کی تصدیق لازمی قرار دلوا کر آپ نے ہمیشہ ہمیشہ کیلئے اس فتنے کو دفن کر دیا، پنجاب کریکولم اینڈ ٹیکسٹ بک بورڈ ترمیمی بل منظور کروانے پر تمام علماء کرام آپ کے مشکور ہیں: قاری حنیف جالندھری

لاہور(12جولائی2020) سپیکر پنجاب اسمبلی چودھری پرویزالٰہی سے سیکرٹری جنرل وفاق المدارس قاری محمد حنیف جالندھری نے ملاقات کی اور چودھری شجاعت حسین کی خیریت دریافت کی۔ ملاقات میں باہمی دلچسپی کے امور پر تبادلہ خیال اور اسلام دشمن عناصر کے خلاف مل کر لائحہ عمل مرتب کرنے پر اتفاق کیا گیا، راسخ الٰہی بھی ملاقات میں موجود تھے۔ سپیکر چودھری پرویزالٰہی نے کہا کہ آپ جیسے علماء کرام کی اسلام کیلئے گراں قدر خدمات کو کبھی فراموش نہیں کیا جا سکتا، علماء کرام کے ہوتے ہوئے اسلام دشمن عناصر اپنے مقاصد میں کبھی کامیاب نہیں ہو سکتے۔ قاری حنیف جالندھری نے چودھری پرویزالٰہی کو خراج تحسین پیش کرتے ہوئے کہا کہ متحدہ علماء بورڈ سے دینی کتب، مذہبی مواد کی تصدیق لازمی قرار دلوا کر آپ نے ہمیشہ ہمیشہ کیلئے اس فتنے کو دفن کر دیا ہے۔ انہوں نے کہا کہ پنجاب کریکولم اینڈ ٹیکسٹ بک بورڈ ترمیمی بل منظور کروانے پر تمام علماء کرام آپ کے مشکور ہیں، اسلام کیلئے آپ کے گھرانے کی گراں قدر خدمات کو کبھی فراموش نہیں کیا جا سکتا۔