عمران خان بچوں کے ساتھ زیادتی اور قتل پر سخت قانون لائیں ہماری پارٹی اس کی بھر پور حمایت کرے گی: چودھری شجاعت حسین
September 15, 2020
Featured, News, Urdu News
282 Views
وزیراعظم ہائیکورٹ سے خصوصی عدالتوں کے قیام کی استدعا کریں کہ ایسے سنگین جرائم کا فیصلہ ایک ہفتے میں کیا جا سکے
لاہور(15ستمبر2020) پاکستان مسلم لیگ کے صدر و سابق وزیراعظم چودھری شجاعت حسین نے وزیراعظم عمران خان سے مطالبہ کیا ہے کہ وہ ملک میں بڑھتے ہوئے بچوں کے ساتھ زیادتی جیسے سنگین جرائم کو ختم کرنے کیلئے قانون بنائیں ہماری پارٹی اس قانون میں ان کا بھرپور ساتھ دے گی، عمران خان لوگوں کی پروا نہ کریں لوگ آتے جاتے رہتے ہیں اور ان میں سے بہت سے ایسے ہوتے ہیں جن کو ہمارے ملک کے حالات کا پتہ ہی نہیں ہوتا اور وہ ہمیں مشورہ دینے کی کوشش کرتے ہیں لیکن جس پر یہ گزرتی ہے اس کا دکھ صرف وہی سمجھ سکتا ہے اس لئے عمران خان کو اپنے ملک کی خاطر خود فیصلہ کرنا چاہئے۔ چودھری شجاعت حسین نے کہا کہ یہ سانحہ موٹروے پر نہیں بلکہ اس سے تین چار میل دور پیش آیا جبکہ شہباز شریف نے قومی اسمبلی میں تقریر کرتے ہوئے خواہ مخواہ موٹر وے کی تعمیر میں اپنا حصہ تو ڈال دیا لیکن جرم کا کوئی ذکر نہیں کیا، یہ تو ایسا ہے کہ سابق صدر آصف علی زرداری کے سامنے انہوں نے ان کی تعریف تو کر دی لیکن وہ یہ بھول گئے کہ انہوں نے ہی سابق صدر زرداری کو پھانسی پر لٹکانے کے بعد ان کی لاش کو خود سڑکوں پر گھسیٹنے کا کہا تھا اور یہ بات کرتے ہوئے جوش میں مائیک بھی توڑ ڈالا تھا۔ انہوں نے کہا کہ عمران خان قومی اسمبلی میں اس سانحہ پر بات کرنے کے بجائے ہائیکورٹ سے استدعا کریں کہ ایسے سنگین جرائم کے مقدمات سننے کیلئے خصوصی عدالتیں قائم کریں اور یہ خصوصی عدالتیں ایک ہفتے میں فیصلہ کریں، بروقت فیصلوں کے بعد سنگین جرائم میں نمایاں کمی آئے گی اور عوام میں خوف و ہراس کا خاتمہ ہو گا۔
