چودھری وجاہت حسین جیسے سینئر سیاستدان اور ان کے بیٹے موسی الٰہی پر بے بنیاد مقدمہ درج کرنا قابل مذمت ہے: چودھری پرویزالٰہی

ہمارے ساڑھے پانچ ماہ کے دور حکومت میں کسی ایک سیاسی کارکن کے خلاف انتقامی کارروائی نہیں کی گئی

ن لیگ کی منتقم قیادت نے سانحہ ماڈل ٹاؤن سے بھی کوئی سبق نہیں سیکھا، شریف جب بھی اقتدار میں آتے ہیں تو رانا ثناء اللہ اور عطاء اللہ تارڑ جیسے لوگ چوزوں کی طرح پھدکنا شروع کر دیتے ہیں

لاہور(25جنوری 2023) سابق وزیراعلیٰ پنجاب چودھری پرویزالٰہی نے کہا ہے کہ ہمارے ساڑھے پانچ ماہ کے دور حکومت میں کسی ایک سیاسی کارکن کے خلاف انتقامی کارروائی نہیں کی گئی، جس طرح چودھری وجاہت حسین جیسے سینئر سیاستدان اور ان کے بیٹے موسی الٰہی پر بے بنیاد مقدمہ درج کیا گیا وہ قابل مذمت ہے۔ انہوں نے کہا کہ ن لیگ کی قیادت انتقام کی سیاست پر یقین رکھتی ہے، سانحہ ماڈل ٹاؤن سے بھی انہوں نے سبق نہیں سیکھا، شریف جب بھی اقتدار میں آتے ہیں تو رانا ثناء اللہ اور عطاء اللہ تارڑ جیسے لوگ چوزوں کی طرح پھدکنا شروع کر دیتے ہیں، شریفوں کی تاریخ اپنے مخالفین کے خلاف ایسی انتقامی کارروائیوں سے بھری ہوئی ہے۔ چودھری پرویزالٰہی نے کہا کہ پنجاب پولیس نے 16 اپریل کو جس طرح ارکان پنجاب اسمبلی پر ایوان کے اندر بدترین تشدد کیا دنیا میں اسکی مثال نہیں ملتی، ارکان اسمبلی پر تشدد میں ملوث سی سی پی او لاہور بلال صدیق کمیانہ اور سابق آئی جی پنجاب کو ہم بھولیں گے نہیں، نہ ہی ہم 16 اپریل اور 25 مئی کے واقعات کو بھولے ہیں۔ انہوں نے مزید کہا کہ شریفوں کے ظلم کی سیاہ رات الیکشن کمیشن کی وجہ سے صرف ڈھائی ماہ کی بچہ سکے کی حکومت ہے پھر ان کے تمام غیر قانونی اقدامات کا حساب ہو گا۔